KINDERDIENS JEREMIA 18: APRIL 2013

Transcriptie

1 1 KINDERDIENS JEREMIA 18: APRIL 2013 Liewe kinders, broers en susters, (1 a)het julle al iets probeer bou met LEGO s en dan n baie (1b)goeie plan gehad van wat jy wil bou maar toe werk dit nie uit nie? En toe dit nie uitwerk nie wat maak jy? (gooi jy LEGOs weg?) (1c)Nee! Jy begin weer van voor af! (2)Het julle al n rekenaarspeletjie gespeel en nèt sodra jy na n hoër vlak toe moet gaan, dan gebeur daar iets en jy máák dit nie tot op die volgende vlak nie wat doen jy dan? (breek jy dit?) (3)Dit gebeur mos baie keer in ons lewe ook sò! Ma sê vir jou om jou kamer skoon te maak dan maak jy skoon, en jy maak skoon maar as sy kom kyk, dan is sy nie tevrede nie. As hierdie dinge met ons gebeur wat net nie wil uitwerk soos ons gehoop het dit sal uitwerk nie hoe voel n mens dan? Het jy al gevoel of jy sommer net nie goed genoeg is nie? Niemand hou mos daarvan om nie goed genoeg te wees te wees nie!!!

2 2 Jeremia 18 vertel n verhaal wat nog slegter is. Dit vertel dat Israel soos pottebakkersklei in God se hand gevorm is, maar Hy was nie met die produk tevrede nie!!! Hy het hulle toe soos klei opgefrommel en van voor af begin vorm. Wat sleg is met vandag se boodskap is dat dit KLINK of God dalk ook kan sê ons het misluk en dat Hy ONS nie ons handewerk nie, maar vir jou en my gaan opfrommel, brei en oormaak Die Here het die profeet Jeremia baie, baie jare gelede (2634 jaar gelede) op n dag geroep en vir hom gesê Hy is baie moedeloos en hartseer omdat Juda en Israel (dit is God se eie mense) nie na Hom wil luister nie. Hy roep toe vir profeet Jeremia en sê vir hom dat hy na die pottebakker se huis toe moet gaan. Hy moet gaan kyk hoe die pottebakker werk. Toe hy (4a)by n pottebakker se werkwinkel instap, was die pottebakker toe juis besig om iets op die draaiwiel te maak. Ten spyte van sy groot moeite om van die klei iets moois te maak, het die pot nie vorm aangeneem soos wat die pottebakker gehoop het dit sou nie... sy projek het misluk! Toe het die pottebakker (4b)doodluiters die klei gevat, dit opgevrommel, dit weer sag en soepel geknie en van voor af met die pot begin en dit gemaak presies soos hy dit wou hê.

3 3 Die Here het vir Jeremia na die pottebakker toe gestuur, want hy wou vir hom n boodskap gee. Hy wou Jeremia iets leer, wat hy weer vir Juda (God se mense) moet gaan leer sodat ons vandag ook uit hierdie verhaal iets kan leer. Die Here is soos daardie Pottebakker. Israel is die klei. In vers 11 word meer spesifiek na Juda en Jerusalem verwys as die klei. Die Here het n plan met die klei (en dus ook met ons). Die Here weet wat Hy met die klei wil maak. As die klei nie word wat die Here daarmee in gedagte gehad het nie, vat Hy die mislukte stuk, brei dit van voor af en vorm die klei weer op die skyf totdat dit is wat Hy daarmee wou maak. Wat leer ons uit hierdie verhaal vanmore? Ons leer dat God Almagtig is. Hy kan met die klei maak net wat Hy wil! Hy is die Pottebakker. Jy en ek is die klei. Jesaja 64:8 stel dit mooi: U is (5a)ons vader, Here, ons is klei en U het ons gevorm, ons is almal die werk van u hande. Paulus het ook baie jare later vir mense geleer dat God baie mag het wanneer hy in Romeine (5b)9:20-22a vra: Mens, wie is jy per slot van rekening dat jy met God wil redeneer? Hoe kan die maaksel vir sy maker sê: Waarom het jy my so gemaak? Het die pottebakker nie die reg om uit dieselfde klomp klei iets besonders én iets alledaags te maak nie? En as God dieselfde wou doen? Maar Jeremia 18 wei nie veel verder oor hierdie tema uit nie. Die

4 4 boodskap is eerder: God is al eeue lank besig om sy volk te vorm soos Hy dit wil hê, maar dit het misluk. Maar dit is nie God (6) (die Pottebakker) se skuld nie. Die fout lê by die klei. Die Here se volk wil hulle nie bekeer nie. Hulle wil liewer hulle eie pad loop. (mense kan kies...) Maar hoor mooi: Gelukkig gooi die Pottebakker (God) nie die klei weg nie!!! Hy hou nog baie van die klei(want Hy kan nog iets moois maak daarmee) al Hy hou niks van die vorm nie (van hoe die kleipot uitgekom het nie). Die Pottebakker vat die mislukte, lelike pot en brei dit weer van voor af om n nuwe, mooier pot te vorm. Jeremia 18 wil nie in die eerste plek vir ons kom sê dat God baie groot is en mag het en dat Hy kan maak soos Hy wil nie!!! Nee, dit vertel eerder van God se teleurstelling dat die klei misluk het. Dat die klei nie geword het wat Hy daarmee wou bereik nie. God is met ons besig. Hy vorm ons ook soos n stuk klei in sy hand. Maar die hartseer is dat ons ook misluk. Ons kom nie altyd uit soos die Pottebakker ons wou hê nie. Dalk dink julle nou dadelik aan mislukkings soos mense wat verslaafdes is of mense wat in die tronk is. Ons kan ook aan ander vorme van mislukking dink: as ek nie as n leier verkies is nie of as ek nie n plek in die rugbyspan gekry het nie. Die Bybel leer ons egter

5 5 dat wanneer jy God se bedoeling met jou lewe mis, DAN is jy n mislukking!!! (7)Wat is God se bedoeling met ons? Die Here wil hê dat ons sò sal lewe dat alle mense sal weet en sien ek behoort aan die Here hulle moet sien ek is LIEFvir God en ek EER Hom. God het ons nie gemaak sodat ons n rugbykaptein moet word of n skaakkampioen moet wees nie of dat ons eendag n rustige oudag kan geniet of n suksesvolle sakepraktyk kan opbou nie. God het my gemaak om Hom te eer!!! As my lewe dus net om myself draai en nie om God nie het dit misluk!!! Die wêreld kan dalk dink dat my lewe n groot sukses is. Jy dink dalk dat jy iets bereik het. Mense bewonder jou dalk. Maar selfs die mens met die beste prestasies, die meeste mag of geld is volslae mislukkings in God se oë as GOD nie die inhoud, die fokus van hulle lewe is nie. Voel jy dalk dat ek oordryf? Gaan blaai dan weer deur die Bybel. Die boodskap is oral: God word nêrens voorgehou as die middel (die instrument) om ons begeertes te bevredig nie. God is nie die towenaar wat in ons diens staan om òns (8)suksesvol te maak nie. Nee, God is die DOEL van ons lewe!!! En as jy hierdie doel nie bereik nie, is jou lewe n mislukking!!! Efesiërs 2:10 sê:... God het ons gemaak wat ons nou is: in Christus Jesus het Hy ons geskep om ons

6 6 lewe te wy aan die goeie dade waarvoor Hy ons bestem het. God het n doel met jou lewe. Spreuke 16:4 sê: Die Here het alles gemaak met n doel. (9a)As ons ons Godgegewe doel mis, gaan die Here ons soos klei opfrommel en weer brei en weer vorm totdat ons is wat Hy wil hê dat ons moet wees (dis nie God se straf nie dis sy genade oor ons). Onthou: Sonde is om God se doel te mis! (9b)Die troosboodskap is egter dat God ons nie sal weggooi nie. Hy wil ons nog n kans gee. Hy wil ons verander in kinders wat Hom dien en volg en gehoorsaam. MAAR daar is ook n waarskuwing: In vers 11 sê die Here dat Hy besig is om n besluit te neem. Israel het nog kanse gekry, maar wou nie luister nie!!! Uiteindelik het God ingegryp!!! Jerusalem is verwoes en Juda is in ballingskap weggevoer. (10)Jy met jou eie agenda, met jou eie ideale, stuur op n reuse mislukking af!!! Uiteindelik het Jeremia 18 dus n kragtige uitnodiging: Maak julle lewe en julle dade reg! Maak die fokus van jou lewe reg(11). Kom terug na die Here. Bely jou skuld!!! Kom soos Lukas 15:17-21 se verlore seun terug met n nederige gesindheid en n opregte belydenis: Ek het gesondig... Sê soos die Here se volk in Jesaja 64:8: U is ons vader, Here, ons is klei...

7 7 Dalk reken jy dat jy darem nie tussen die varke sit soos die verlore seun nie!!! Onthou dan dat Juda n tyd van groot herlewing onder koning Josia beleef het (lees gerus 2 Kon 23 en 2 Kron 34:1-7). Die wetboek is ontdek. Afgodsaltare is afgebreek. Pasga is weer gevier. Tog is dit duidelik dat die volk nie met hulle hele hart bekeer het nie!!! God se volk het steeds n eie agenda gehad. En jy? Hoor weer God se roepstem: Maak julle lewe en julle dade reg! Maak God die middelpunt van jou lewe. Hierdie appèl word duidelik in Romeine 2:4 verwoord: God is ryk in goedheid, verdraagsaamheid en geduld! Sê dit vir jou niks? Besef jy nie dat God jou deur sy goedheid tot bekering wil lei nie? (11)Dis dan dat die Here met n ongekende liefde en deernis kom om ons klei weer soepel en glad uit te knie, sodat Hy van ons iets moois en waardevols kan maak. Dit is hoe God by ons betrokke raak. As ons met al die dwase keuses wat ons maak onder sy hande rebels rondwriemel, en misvorm ander kant uitkom, dan sien Hy kans om vir elkeen wat hom/haar tot die Here bekeer, - vir elkeen wat opnuut weer smag na heelheid en versoening met God weer geduldig onder sy hande te neem en iets besonders van jou te maak. DIS wie God is!!! Amen

8 8 Sondag 14 April 2013 Jeremia 18:1-11 Liturgie: Voorsang: Afkondigings Toetredelied: 543:1,3 Votum en seën Lofprysing: 547:1,2,3 Wet: 243 Belydenis: 292:1 Gebed Skriflesing: Jeremia 18:1-11 Preek Slotgebed Slotsang: 528:1,2,3 Seën Wegsending: 313