Ons fokus vandag op die tydperk tussen Jesus se opstanding en Sy hemelvaart, en die invloed wat dit op mense gehad het.

Transcriptie

1 Jacobus 3:13-18 Ds Willem Kotze Eers agtergrond inligting: Ons fokus vandag op die tydperk tussen Jesus se opstanding en Sy hemelvaart, en die invloed wat dit op mense gehad het. n Tydperk van 40 dae, nadat Jesus uit die dood uit opgestaan het, tot by Sy hemelvaart. n Maand en n half wat gladnie in detail in die Bybel vir ons beskryf word nie. Waar was Hy hierdie hele tyd? Ons weet nie. Enkele grepe uit hierdie tyd word deur die Bybel aan ons geopenbaar soos die verskillende mense aan wie Jesus in hierdie tyd verskyn het. Aan Maria Magdalena daar by die graf, daardie Sondag van Sy opstanding. Die aand aan die dissipels sonder Thomas. n Week daarna weer aan die dissipels, en ook aan Thomas in besonder. Daar was ook ander aan wie Jesus verskyn het, soos o.a. aan Jakobus. Nêrens in die evangelies word hierdie verskyning aan Jakobus vermeld nie, en ons sou nie daarvan geweet het nie, as Paulus dit nie in 1 Kor 15 aan ons meegedeel het nie. In sy skrywe aan die Korinthiers verdedig Paulus Jesus se opstandinbg uit die dood. Hy skryf : Jesus is begrawe en op die 3e dag opgewek. Hy het aan Petrus verskyn, daarna aan die dissipels, daarna aan 500 broers tegelyk en daarna aan Jakobus. Dit is hierdie Jakobus wie se brief ons vanoggend lees... Jakobus 3:13-18 Die onderwerp waaroor Jakobus skryf is n vergelyking tussen aardse wysheid en hemelse wysheid. Die aardse mens teenoor die hemelse mens. Die kenmerke van die aardse mens, vasgevang in aardse wyshied, is selfsugtig, na-ywerig, sinlik, demonies Die kenmerke van die hemelse mens, wat leef met hemelse wysheid is vredeliewend, inskiklik, bedagsaam, vol medelye, onpartydig, opreg. Wat n ommekeer in iemand se lewe? Vir Jakobus. In wie hy was teenoor dit wat hy hier skryf, moes daar n totale hartsverandering plaasgevind het. Inskiklik, vredeliewend, onpartydig dit was gladnie Jakobus nie Iets moes in sy lewe gebeur het dat daar so n geweldige verandering plaasgevind het. 1

2 Daardie iets was Jesus se verskyning aan hom nadat Hy uit die dood opgestaan het. Ons weet nie waar en wanneer nie maar in hierdie gesprek moes alles gebeur het. Hierdie Jakobus was Jesus se broer, saam met Josef, Simon en Judas, seuns van Josef en Maria. Dit was die mense se grootste verbasing toe Jesus begin wonders doen het, talle mense genees het toe hulle gevra het : Maar waar kry Hy hierdie vermoë om sulke kragtige dade te doen. Is Hy dan nie die timmerman se seun nie? Is Sy ma nie Maria en sy broers Jakobus, Josef, Simon en Judas nie? En Sy susters, is hulle nie almal hier by ons nie? Jakobus, Jesus se eie broer wat met Jesus niks te doen wou hê nie. Op verskeie plekke in die evangelies lees ons : Selfs Jesus se eie broers het nie in Hom geglo nie. Sekerlik nie vreemd as jou broer wat vir 30 jaar saam met jou grootgeword het, nou skielik begin vertel dat Hy die Messias is nie. Of hulle Sy wondermag bloot as vreemde verskynsel beskryf het, of hulle hom bloot geignoreer het, weet ons nie, Punt is : hulle het nie in Hom geglo nie, vir die een oomblik gedink Hy is die Messias, Seun van God nie. En kan jy jou nou indink, broer en suster, die spanning tussen Maria en haar ander kinders, wat Jesus afgelag het. Maria, wat van die engel wat aan haar as jong dogter verskyn het, hierdie nuus oor wie Jesus was, in haar hart bewaar het. En hoedat sy haar seuns en dogters, nadat Jesus Homself as Messias begin verklaar het, moes probeer oortuig dat Hy nie nonsens praat nie, dat Hy nie die een of ander afwyking het nie, maar waarlik is wie Hy sê Hy is. En hulle het haar nie geglo nie nie in Jesus geglo nie. Niks wat Hy gesê of gedoen het, het hulle van Sy egtheid oortuig nie. Dit wat Jakobus self hier lys : vredeliewend, inskiklik, onpartydig nee niks van dit het in hom geleef nie. Daar sou n hartverandering in hom moes plaasvind. En die Bybel vertel ons dat hierdie verandering gekom het na Jesus se opstanding. In hierdie 40 dae moes Hy êrens saam met Jakobus gesit het, hom presies vertel het van waar alles begin het. Sou Jakobus trane in sy oë gekry het oor hy dit alles summier net afgelag het? Maar hier kom die groot verandering by Jakobus, n ware bekering van aardse mens na hemelse mens. n Verandering uit die aardse wysheid en n leef vanuit die hemelse wysheid. Jakobus het presies geweet waarvan hy praat die aardse mens leef in selfsug, bittere naywer of afguns, sy lewe getuig van wanorde, selfs allerhande gemene dade. Teenoor die mense wat die hemelse wysheid van Bo ontvang het, wat gevul is met God se Gees, wie se lewe streef na die voorbeeld van Christus : vredeliewend, inskiklik, bedagsaam, vol medelye, onpartydig, opreg. 2

3 Die beeld wat Jakobus skets is presies die prentjie wat die uitbeelding van die breë weg en die smal weg aan ons voorhou. Die breë weg loop verby alles wat die wêreldse genot en plesier verteenwoordig, die kroeg, die casino, die gesellinklub. Daar is ook n donkie wat mishandel word, n man wat besteel word, iemand wat koelbloedig doodgeskiet word, uitbeelding van geweld, korrupsie, n wêreld van selfsug en liefdeloosheid. Jakobus noem dit aardse wysheid, dit het geen diepte nie, dit verkondig : laat ons eet en drink, die lewe van vandag geniet, want more is ons dood en dan is alles verby. Die soort denke, skryf Jakobus, kom nie van God nie, dis aards, sinlik, selfs demonies. Dit lei tot wanorde en allerhande gemene dade. Op die smal weg tref jou onmiddelik die omgee en die liefde vir ander mense gedryf vanuit die kruis van Christus, gerig op die einddoel van n nuwe lewe. Die wysheid van Bo is sonder bybedoelings, skryf Jakobus, dit is opreg, ingegee in die mens se hart deur die Gees van God dit kom nie uit jouself nie. Dit is die hartsverandering wat Jakobus self moes ondergaan wat self so wêrelds was, eiewillig, selfgerig, om Jesus nie te wou erken as gestuurde van God nie. Maar as die Gees jou oë open, die wysheid van God, dan erken jy Jesus Christus, die opgestane Verlosser, my Here en my God. Dan erken jy Jesus Christus as koning van jou lewe, in wie se voetspore jy wil volg, wie se beeld jy wil vertoon in alles wat jy doen,. Dan leef jy vredeliewend, iemand wat vrede soek, en vrede nastreef, n liefde vir vrede. En vrede, weet ons, begin eers as jy in die regte verhouding met God lewe, want vrede is om in harmonie met God te wees, orde tussen jou en God. En as daardie harmonie oorspeel in jou verhouding met jou medemens. Waarskynlik het Jakobus hier teruggedink aan hoeveel kere hulle as broers en susters verskriklik verkleinerend was teenoor broer Jesus. In Johannes 7 lees ons van n insident, dat toe hulle as gesin hoor dat Jesus nie na die huttefees toe gaan nie, hulle vir Hom gesê het : Hoe so dis eintlik waar jy moet optree, by die huttefees. Daar is al die mense bymekaar, daar het jy ten minste n ordentlike gehoor, voor wie jy al jou toertjies en truuks kan doen. Maar dis aardse wysheid, selfsugtig, afgunstig. Nee, leef vredeliewend. Gun en gee aan n ander wat hom toekom. Die wysheid van Bo is ook inskiklik of vriendelik. En daarmee saam : bedagsaam. Om vanuit die Gees van Christus te leef, weet jy dat n sagte antwoord dikwels baie meer doen as om koud en klinies die letter van die wet toe te pas. 3

4 As n vrou wat in owerspel betrap is na Jesus toe gebring word, dan weet Hy die wet sê dat sy gestenig moet word maar Hy weet ook dat Hy baie meer mense gaan raak met n sagte antwoord : Laat die een van julle wat sonder sonde is, die eerste klip op haar gooi. Jesus maak dus nie die wet die maatstaf nie, maar genade en vergifnis. Inskiklik, om bedagsaam te wees. Aan die vrou sê Hy : Ek veroordeel jou ook nie, gaan maar, en moet van nou af nie meer sondig nie. Die wysheid van Bo, n lewe gerig deur God se Gees, vra dat jy sal let op jou woorde na ander mense toe. Jy mag dalk voel jy het nou die reg om uitmekaar te skeur, die Gees roep jou op tot bedagsaamheid. Bedagsaam hoe jy jou mening formuleer, bedagsaam in jou optrede teenoor ander. Die wysheid van Bo is ook vol medelye, skryf Jakobus. Hoe anders dat dit hom nie sou opval in sy nuwe kyk na Jesus nie? En hy die Ou testamentiese profesieë oor die Messias nou eers waarlik begryp het. Dat die Seun van God waarlik mens word om so ten volle medelye te kan hê met ons swakhede en ons gebreke. Jesus se medelye was elke dag sigbaar in alles wat Hy gedoen het ook dit moet jou lewe elke dag kenmerk. In ware selfondersoek moes Jakobus ook skryf : Die wysheid van Bo is onpartydig. Dit skryf nie net af nie, dit vra na die waarheid. Dit veroordeel nie net voor die voet nie, dit luister eers, dit gee ruimte, dit hoor in liefde. Om onpartydig te wees, beteken om eers leeg te word van jouself, om te besef die vergifnis wat ek ontvang het, is net so geldig vir n ander. Om te onthou : Laat die een wat sonder sonde is maar die eerste klip gooi. Jakobus sluit sy lysie van hemelse wysheid af : Dit is ook opreg. Elkeen wat hom deur die Gees laat lei buig in gehoorsaamheid voor die Here. Nie ek op die voorgrond nie, nie my wil nie, maar opreg onder leiding van God se Gees. Jakobus self het n gesindheidsverandering nodig gehad om dit te leer as hy hierdie brief skryf kon hy so maklik begin het : Van Jakobus, die broer van die baie bekende Jesus van Nasaret, en weereens die lig op homself laat val het. Nee hy begin sy brief : Van Jakobus, n dienaar van God en die Here Jesus Christus. Hemelse wysheid is om nie maar aards te dink nie, nie die mens in die middelpunt nie, maar hemels, Christus gefokus. Ek weerkaats die lig van God se Gees deur my na hulle rondom my. 4

5 Dit vra n gesindheidsverandering. Nie meer : Ek wil n huweliksmaat hê wat my gelukkig maak nie, maar in watter mate deel jy geluk uit. Nie meer : Al die motors moet padgee as ek verby kom nie, maar in watter mate kan jy opsy staan? Nie meer : Ek dink ek is geregtig dat almal my standpunt moet hoor nie, maar in watter mate kan jy toegee t.w.v. vrede. Hemelse wysheid is om na die beeld van Christus te leef. Sy opstanding uit die dood oorwin die aardse lewe en dood, in Hom leef ons, as hemelse mense, burgers van God se koninkryk. Laat jou lewe daarvan getuig. Leef dan as Geesvervulde mens! Amen! 5