Sondag 20. Lees: Johannes 16:1-15

Transcriptie

1 Sondag 20 Lees: Johannes 16:1-15 Christus in ons In die vorige preke het ons aandag gegee aan wie Christus is en wat Hy vir ons kom doen het. Hy het baie skatte om uit te deel en is self 'n ryk skat. Rykdom wat ons kan begeer om te hê. Dit is baie belangrik om daarop te let dat, hoe ryk Christus ook al is, ons self arm sal bly so lank as wat ons ver van Christus bly staan. Alles wat Christus vir die verlossing van sy kinders gedoen het, sal vir ons waardeloos wees as ons los van Christus bly. As ons deur Christus ryk gemaak wil word, moet Christus self ons s n word. Hy moet nie ver weg van ons bly staan, sodat ons Hom in sy groot rykdom, glorie en heerlikheid kan bewonder nie. Soos wat niemand wat sterwend is van dors, sal bly lewe as hy net bly staar na die heerlike water in 'n glas nie. As Christus werklik vir ons tot voordeel wil wees, dan moet Hy in ons kom woon. En dit doen Hy met sy Gees. Dit is die aangrypende in Sondag 20. Want Christus kom in ons woon deur die Heilige Gees. Dit is sy werk. Wanneer Christus aan die einde van sy bediening hier op aarde kom, dan maak Hy self die belofte van die Gees wat na sy hemelvaart sal kom. Hierdie Gees sal Christus verheerlik. Hy sal neem dit wat aan Christus behoort en aan sy dissipels verkondig. En alles behoort aan Christus. Die Vader het Hom alles gegee. Dit is die besondere werk van die Gees dat Hy my deur 'n ware geloof wat Hy my gee, deel laat kry aan Christus en al sy rykdomme. Deur die evangelie maak die Gees my nou skatryk. Die apostel Paulus sê dit op 'n ander manier (Romeine 8:14-15). Elkeen wat deur die Gees van God gelei word, is 'n kind van God. Ons het nie ontvang 'n gees van slawerny om te vrees nie, maar ons het ontvang die Gees van aanneming tot kinders. Dit is deur die Gees dat ons roep: "Abba, Vader!" Niemand kan dit uitroep sonder die Gees nie. Soos wat niemand in Christus kan glo sonder die Gees wat in hom woon nie, so kan niemand God as Vader ken sonder die Gees deur wie ons God kan aanspreek as ons Vader nie. Die Gees is self ook God Ons gaan nou in die eerste plek let op die Gees wat self ook God is; wat 'n geweldige betekenis dit vir ons inhou. Soms bestaan daar by ons baie vrae oor wie die Gees is en wat Hy doen. As ons alleen maar op die Johannes-evangelie let, dan hoor ons die volgende dinge oor die Gees. Ons leer daar: die Gees word deur die Vader gegee; Hy is met en in die dissipels van Christus; ook lees ons dat die wêreld Hom nie kan ontvang nie. Die Gees leer ons; Hy gee getuienis; Hy oortuig; Hy verheerlik; Hy openbaar; Hy gee gawes. Dit alles weet ons uit die evangelie van Johannes. En dan het ons nog nie eens gelet op alles wat daar genoem word nie. Al hierdie dinge is werke van die Heilige Gees. Dit is heel aangrypend. Is dit dan nie dinge wat ook van God self gesê word in die Bybel nie? Ja, want die eerste wat ons moet sien, is dat die Gees self ook God is. Die Gees is nie maar een of ander onbegryplike krag nie. Hy is werklik, saam met die Vader en die Seun, God. Die Gees is self ook 'n Persoon. Miskien gaan ons dit die duidelikste verstaan wanneer ons daarop let dat ons die Gees werklik kan bedroef. Ons sondige lewe bedroef die Gees van God. Ons bedroef die Gees en kan selfs die Gees uitblus wanneer ons Hom weerstaan. Wanneer Hy teenoor ons van Christus en sy genade getuig en ons weerstand daarteen bied. Ook bedroef ons die Gees en kan ons Hom uitblus wanneer ons die evangelie ignoreer of onbelangrik ag. Wanneer ek my so besig hou met my eie sonde, dat ek die volmaakte verlossing in Christus nie waardevol ag nie. Want dit is juis daardeur dat die Gees in ons wil werk. Hy wil ons deur die evangelie geloof in

2 Christus gee. Ons bedroef en blus die Gees uit wanneer ons die eredienste onbelangrik ag en versuim. Want dit is veral daar waar die Gees met ons wil werk. Die Gees word bedroef wanneer Hy ons deur die prediking aanspreek en ons die preek langs ons neerlê en niks daarmee doen nie. Ons stap uit die erediens uit en dit het ons nie eers geraak nie. God die Gees word bedroef! Want dit is die Gees wat deur die prediking geloof in ons harte wil werk. So bely ons later in Sondag 25. Dit kan ons nie sommer naas ons neerlê nie. Dit is die Gees wat deur die sakramente ons swak en wankelende geloof wil versterk. Vanaf Sondag 25 van die Heidelbergse Kategismus bely ons die doop en die nagmaal, die sakramente, wat instrumente is in die hand van die Gees. Hoe dikwels geringskat ons die sakramente. Dit is iets wat die dominee doen; ag, dit is maar water, wyn en 'n stukkie brood; en dan gaan ons weer verder. Ons bedroef en weerstaan die Gees van God wanneer ons hierdie dinge nie ontvang as van God, wat met ons besig is, nie. Te maklik vergeet ons dat dit die Gees is wat in en deur die Woord altyd met ons besig is. Laat ons maar net dink watter moeite die Gees met ons het om ons te oortuig van ons sonde. Of om ons nederig te maak en ons te verootmoedig. Maar dink ook net hoe ons die Gees weerstaan wat ons die geloof in Christus wil gee. Dink net hoe ons die Gees van God bedroef met ons sonde, ons ongeloof en hardheid van hart. Hierdie Gees is nie maar een of ander onpersoonlike krag wat na ons toe kom nie. Hierdie Gees is saam met die Vader en die Seun God. Hy is nie minder as die Vader en die Seun nie! Hy wat die Gees van God weerstaan, weerstaan God self! Soveel as wat ek gedoop is in die Naam van die Vader en die Seun, is ek ook gedoop in die Naam van die Heilige Gees. Hy is van ewigheid af God, net soos die Vader en die Seun. Dit is opmerklik dat wanneer Stéfanus voor die Joodse Raad, wat die evangelie verwerp, staan, hy hulle so beskuldig: "Julle weerstaan altyd die Heilige Gees; net soos julle vaders, so ook julle" (Handelinge 7:51). Soos wat die priesters en skrifgeleerdes hulle verhard teen die Gees, so het hul voorouers dit ook reeds gedoen. Die Gees is dus duidelik al in die Ou Testament weerstaan. Die Gees kom nie op Pinksterdag uit die bloute tevoorskyn as een of ander krag van God nie, maar die Gees is God. God wat besig was met sy volk om hulle harte te wen. Hy was reeds aktief by die skepping betrokke. Ons het in Psalm 104 gesing van die Gees wat die aangesig van die aarde nuut maak. Dit is die Gees, wat lewe gee wanneer daar 'n klein bokkie gebore word. Daarvan lees ons in Psalm 104. Vanwaar kom die wisseling van seisoene elke keer? Vanwaar kom dit dat u elke dag 'n werkgeleentheid het en dat dit met u besigheid goed gaan? Psalm 104 sê: Dit kom van die ewige Gees van God! Die Gees van God, wat van die skepping af verder daaraan werk. Hoe is dit moontlik dat die diere dragtig word en u kinders kan hê? Dit alles werk die Gees. Van altyd af werk die Gees saam met die Vader en die Seun. In Johannes 15:26 lees ons dat die Gees van die Vader uitgaan en in Johannes 16:17 dat Hy ook van die Seun uitgaan. Wat word nou presies met die woorde bedoel? Dit bely ons so mooi in Die Geloofsbelydenis van Nicéa: "ons glo in die Heilige Gees, wat Here is en lewend maak. Hy gaan van die Vader en die Seun uit..." Dit wil sê: hierdie Gees is saam met die Vader en die Seun van alle ewigheid af God, besig om lewe te skenk en dinge nuut te maak; om dit, wat nie bestaan nie, te roep en te maak dat dit bestaan. Dit is die Gees se werk. Wat beteken dit nou vir ons? Is dit nie teoloë-kos nie? O nee! Dit is die lewende evangelie vir die gemeente! Wanneer die Gees die geloof in Christus in ons kom werk, sodat ons kan uitroep "Abba, Vader!", dan ontvang ons nie maar net "iets" van God nie. Ons kry nie maar net die mooiste geskenke van God nie; ons kry God self. Wanneer die Gees die geloof in ons kom werk, dan mag ons weet dat hierdie Gees van die Vader en die Seun kom. Deur die geloof wat Hy in ons werk, kom verseker Hy ons van God Drie-enig se ewige liefde vir ons. Dit is wat dit ten diepste beteken. Die Gees is nie 'n getuie op sy eie, wat ons dalk kan mislei nie. Sodat, as die Gees in my werk, ek nie hoef te dink: "Ek voel nou wel soos 'n kind van die Here, ek glo miskien in Christus, maar wat dink die Vader van my?" Of ook: "Ek mag nou wel 'n kind van die Here wees, maar ek weet nie wat hierna gaan gebeur nie, of ek nog wel kos op my tafel gaan hê nie." Nee, Hy wat van die Vader kom en my die geloof in Christus gee, is ook die Gees wat werk in die skepping, wat vir my sorg. Sien u dat ek nooit in my lewe hoef te wonder hoe God Drie-enig teenoor my staan nie? Wanneer 2

3 ek al my vertroue op Jesus stel vir my verlossing, dan is dit nie maar iets "toevalligs" nie. Deur die geloof mag en kan ek weet hoe die Vader, Seun en Heilige Gees vir my is. As hierdie God, die Vader wat alles gemaak het, en die Seun wat vir my sondes gesterf het, en die Heilige Gees wat in my kom woon, vir ons is, wie kan teen ons wees? Sien u hoe belangrik dit is om te glo dat die Gees van die Vader en die Seun uitgaan? En miskien moet ek nog byvoeg: dit gebeur nie net in ons verlossing nie. Ons glo ook dat die Heilige Gees van alle ewigheid af van die Vader en die Seun uitgaan. Daarom mag ons weet dat, soos wat God nou vir my in genade in Christus is, so het Hy my in alle ewigheid liefgehad. So was dit altyd! Omdat Hy my van alle ewigheid af liefgehad het, daarom het Hy my van my sonde kom verlos en my nuut gemaak. Dit is die evangelie waarmee ons besig is. Maar dink ook wat het dit alles vir ons te sê oor die vrae waarmee ons gekonfronteer word vanuit die charismatiese beweging. U weet hoe die jongmense op skool gekonfronteer word met vrae oor die Heilige Gees. Hulle vra aandag vir die doop deur die Heilige Gees asof dit iets is wat moet volg op ons geloof in Christus. Die Gees is volgens hierdie leer meer as Christus. Jy mag nou wel in Christus glo, maar nou moet jy ook nog die Gees ontvang. Die Gees kom in 'n ervaring wat min of meer los staan van Christus en die geloof in Hom. Sien u dat die Gees hier eintlik losgemaak word van Christus? Die Gees word Iemand wat bo Christus kom staan met allerlei gawes en geskenke nadat ons reeds tot geloof in Christus gekom het spreek in tale, gawes van genesing en onophoudelike vreugde. Dan word die kinders bang: "Hoe moet ek nou voel in my armoede? Ek glo maar net in Jesus, terwyl die ander gawes van die Gees gekry het." Dan begin hulle wonder of hulle nie ook na die Gees moet soek nie. Maar die Gees het juis gesê: "Ek kom om uit die volheid van Christus te neem en vir julle te gee." Die Gees het nie meer waarde as Christus nie. As Christene glo en bely ons egter dat die Heilige Gees die Gees is wat van alle ewigheid af van die Vader en die Seun uitgaan. Die Gees getuig daarom nooit van Homself nie, maar van die Vader se liefde en die volmaakte werk van Christus. Die Gees gee ons deur die geloof deel aan die verlossing in Christus en aan al sy weldade. Die Gees laat ons die Vader ken as my Vader. Die Gees is nie meer as die Vader en die Seun nie. Die Gees sal neem uit wat in Christus is en aan ons uitdeel. Die Gees praat nie uit en van Homself nie. Hy wat betrokke was by die skepping, kom gee ons ook nou weer die wedergeboorte. Dit is deur die Gees dat Maria swanger word. Die Gees skep hierdie nuwe moontlikheid tot verlossing vir ons. Die Gees rus Christus toe met krag, wanneer Hy met Jesus se doop op Hom kom, sodat Hy sy werk vir u en my kan doen. Wanneer Christus op die Sondagoggend opstaan, is dit die Gees wat lewend maak, wat Hom opwek uit die dood (Romeine 8:11). Ons glo dus dat die Gees wat ons heilig maak, saam met die Vader en die Seun, ware en ewige God is. Die Gees as Getuie Nou gaan ons vervolgens let op die Gees as Getuie. Ons glo verder dat die Gees ook vir ons gegee is, sodat ons deur 'n ware geloof deel kry aan Christus en al sy weldade. In die evangelie van Johannes lees ons van die Heilige Gees wat sal kom as "Trooster", soos dit in ons Bybels vertaal is. Dit is die woord "parakleet" wat op hierdie manier weergegee is. Dalk sou dit beter wees om die woord op hierdie manier onvertaald te laat of beter te vertaal met "getuie" of "pleitbesorger". Wanneer ons dink aan die woord "trooster", dan kry ons dikwels die idee dat die Heilige Gees ons as t ware met sentimentele gevoelens kom oorweldig, dat ons nie so sleg moet voel nie. Maar in die konteks van Johannes 16 gaan dit daaroor dat die Gees kom om te getuig. Want in die vierde evangelie is dit heel opvallend dat die woord "getuie" gereeld daarin voorkom, dat dit soos 'n goue draad deur die evangelie loop. Vanaf die begin lees ons dat die Here God 'n groot saak, 'n regsgeding, teen die wêreld het, teen sy skepping wat teen Hom in opstand gekom het. En in hierdie regsgeding, so lees ons van Johannes 1 af, het Jesus gekom as Woord van God, as die Een wat kom getuig. Wat teen ons gaan getuig terwyl ons in opstand is teen Christus. Maar Hy kom vol van genade en waarheid. Eers lees ons van Johannes die Doper wat die eerste "getuie" is. Hy getuig van Jesus dat Hy die Seun van God is. "Dáár is die Lam van God wat die sonde van die wêreld wegneem!" (Johannes 3

4 1:29). Dan tree Jesus self as tweede "Getuie" op. Jesus sê dat Hy nie uit Homself kom getuig nie, maar sy Vader in die hemel het Hom gestuur om te kom getuig, en die Vader self is sy Getuie. Die Vader getuig van Jesus wanneer Hy by sy doop sê: "Dit is my geliefde Seun in wie Ek 'n welbehae het." Drie getuies Johannes die Doper, Jesus self en die Vader. En in Johannes 16 lees ons van nog 'n "getuie" wat sal kom die Gees van God. Hy, wat van alle ewigheid af saam met die Vader en die Seun God is, kom nou ook om te getuig van Christus. Die Gees kom as Een wat vir die saak van Christus in die wêreld sal optree. Want wanneer Christus opvaar na die hemel, los Hy sy kinders nie alleen op aarde nie, maar Hy beloof sy dissipels dat Hy die Vader sal bid dat Hy hulle 'n ander "trooster", 'n "parakleet", 'n "getuie" sal gee. En dit is vir ons voordelig dat Christus na die hemel gaan, sodat die Gees kan kom as "Parakleet", as Getuie. Want as Hy kom, sal Hy die wêreld oortuig van sonde en geregtigheid en oordeel; Hy sal hulle oortuig van sonde omdat hulle in Jesus nie glo nie (Johannes 17:7-10). Sien u, die Gees tree op as Getuie van Jesus. Waar Jesus as t ware aangekla word deur die ongelowige wêreld, kom die Heilige Gees in die getuiebank staan en getuig Wie Christus is. En Jesus sê in Johannes 16: die Gees wat kom, is die Gees van die waarheid. Hy sal die waarheid spreek! Kort daarna sou Jesus onskuldig vermoor word aan die kruis. Die wêreld sou uitroep: "Kruisig Hom, kruisig Hom!" Hy is 'n Godlasteraar, 'n vraat en 'n wynsuiper (Matteus 11:19). Dit is waarvan Jesus aangekla was. Maar van die waarheid sal getuig word, wanneer die Gees die dissipels sal lei in alle waarheid. Die Gees sal dan ook vir Jesus verheerlik, omdat Hy dit sal neem wat aan Jesus behoort en dit aan ons sal verkondig. Hy sal ons laat sien Wie Jesus werklik is. Hier het ons die rykdom van Pinkster! Op Pinksterdag, nadat die Gees uitgestort is, begin Petrus en die ander preek. Hulle, wat enkele weke tevore nog uitgeroep het: "Kruisig Hom, kruisig Hom!", word nou deur die getuienis van die Gees diep in hulle harte getref deur die evangelie (Handelinge 2:37-38). En nou vra hulle: "Wat moet ons doen, broeders?" Sien u, as die Gees kom om te getuig, dan getuig Hy van sonde, van geregtigheid, van oordeel, sodat hulle wat uitgeroep het: "Hy is 'n vraat en 'n wynsuiper; kruisig Hom!", nou wil weet: wat moet ek doen om gered te word? Dan antwoord Petrus: "Bekeer julle, en laat elkeen van julle gedoop word in die Naam van Jesus Christus tot vergewing van sondes, en julle sal die gawe van die Heilige Gees ontvang." Dit is waarvan die Gees kom getuig: glo nou in hierdie Jesus, vir Wie julle voorheen verwerp het. Deur 'n ware geloof laat die Gees ons deel kry aan Christus en al sy geskenke. Dit is hoe die Gees ons kom troos. Nie met sentimentele gevoelens nie, maar met 'n hartlike, lewendige, liefdevolle geloof in Christus. Die Gees kom getuig van Christus as Parakleet. Dit is hoe die Gees ons "Trooster" is. Die Gees kom maak aan ons die evangelie van Jesus Christus bekend. Maar die Gees doen ook meer as dit. Die Gees kom keer ook ons harte om, sodat ons hierdie evangelie kan glo. Ons sien dit so duidelik aan hulle wat die grootste sondaars in Jerusalem was, hulle wat Jesus gevloek het; hulle harte word verander, sodat hulle nou draers van hierdie evangelie word. Paulus, wat eers die stem van die getuienis van die eerste gemeente wou stilmaak, word self stilgemaak. Hy wat onwillig was om die Here te dien, word gewillig. Die harte wat van nature onwillig was, maak die Gees gewillig. Harte van klip word weggeneem en harte van vlees in die plek daarvan gegee. Die Gees bly by my Ons glo dat die Gees vir ewig by ons sal bly. Die Gees sal nie ophou om vir ons van Christus te getuig nie. Deur die krag van die Gees sal ek, ook in my swakheid, wanneer dit voel of my ongeloof my gaan oorweldig, bly uitroep: "Abba, Vader!" Deur die krag van die Gees sal ek steeds bly glo. En wanneer dit vir my voel asof ek nie meer kan bid nie, dan sal die Gees kom en met onuitspreeklike sugtinge vir my intree by die Vader. Want die Gees kom al ons swakhede tegemoet. Die Gees getuig saam met ons gees dat ons kinders van God is. En as ons kinders is, dan ook erfgename; erfgename van God en mede-erfgename van Christus, sodat, as ons saam met Christus ly, ons ook saam met Hom verheerlik sal word. Want die Gees tree met onuitspreeklike sugtinge vir die heiliges in by God. 4

5 Laat ons getroos lewe deur ons geloof in hierdie Gees van God. Eugene Viljoen