Preek 2 Korintiërs 5:7

Transcriptie

1 1 Preek 2 Korintiërs 5:7 (Preek gelewer tydens gesamentlike erediens van Geref. Kerke Welkom en Welkom-Noord op Sondag 8 Oktober 2017) Prediker: Ds JL van der Schyff Voor die erediens Sing: Lied 588:1,2,3 Sing: Skrifberyming 18-7:1,10,12 Afkondigings Stilte Erediens: Votum Groetseën Loflied: Psalm 145-1:1,4,12 Geloofsbelydenis: Twaalf Artikels Sing: Skrifberyming 12-3:1,2 Die Wet van die Here: Exodus 20:1-17 Gebed: Skrifberyming 10-2 Skriflesing: 2 Korintiërs 4:16-5:10 Fokus: 2 Korintiërs 5:7 Preek: Tema: Ons lewe deur geloof en nie deur sien nie. Gebed Diens van barmhartigheid Sing: Skrifberyming 18-6:1,2,3,4,5 Wegstuurseën Amen: Skrifberyming Preek: Geliefdes in ons Here Jesus Christus Ons loop volgens wat ons sien. Om n voorbeeld te noem: As ek nou na my kar toe wil loop, gaan ek sien hier is trappe. Ek gaan my voete so neersit soos wat ek sien waar die trappe is. Wanneer ek daar kom, gaan ek sien daar is n deur. As ek sien die deur is toe, gaan ek die deur oopmaak. Ek gaan sien waar ek deur die deur kan gaan, en ek gaan daar deurgaan, presies soos ek gesien het. So kan ek aangaan. Kyk egter wat staan in 2 Korintiërs 5:7 (1933/53-Vertaling): Want ons wandel deur geloof en nie deur aanskouing nie. Die woord wandel beteken om te stap of om te loop. Ons sê

2 2 mos: Hy het n entjie gaan wandel. Dan bedoel ons: Hy het n entjie gaan stap. Ons kan dus die woord wandel in 2 Korintiërs 5:7 vervang met stap of loop. Dan lees dit: Want ons stap / loop deur geloof en nie deur aanskouing nie. Die woord aanskouing beteken om te sien. Ons kan dus die woord aanskouing vervang met sien. Dan lees 2 Korintiërs 5:7 soos volg: Want ons stap deur geloof en nie deur sien nie. Of ook: Ons loop deur geloof en nie deur sien nie. Nou is dit so dat die lewe n pad is wat ons moet loop. Dit is ons lewenspad wat elkeen van ons moet loop. Die wandel van 2 Korintiërs 5:7 gaan hieroor. Dit gaan daaroor dat ons die pad van die lewe deur geloof loop en nie deur sien nie. Daarom staan daar in die 1983/92-Vertaling: want ons lewe deur geloof, nie deur sien nie. Dit is baie belangrik dat ons deur geloof sal lewe. Dit is meer as net belangrik. Dit is ook noodsaaklik dat ons deur geloof sal lewe. Hoekom? Want dit stel ons in staat om die werk te doen wat God vir ons gegee het om te doen. Kyk na 2 Korintiërs 4:1 (1983/92-Vertaling): God het Hom oor ons ontferm en hierdie bediening aan ons opgedra.... God het n bediening aan Paulus-hulle gegee. Dit was om die boodskap te bring dat Jesus Christus die Here is. Dit is die evangelie van die heerlikheid van Christus (2 Korintiërs 4:4). Of om die woorde van 2 Korintiërs 5:18 te gebruik: Dit is die bediening van die versoening. Dit is die boodskap dat God deur Christus die wêreld met Homself versoen het deur hulle nie te straf vir al die sonde wat hulle gedoen het nie. Dit was nie vir Paulus-hulle maklik om hierdie werk vir die Here te doen nie. In 2 Korintiërs 11:24-28 word byvoorbeeld vertel van al die ontberings wat Paulus deurgemaak het. Daar staan (1983/92-Vertaling): Vyf maal het ek van die Jode die gebruiklike straf van nege en dertig houe gekry, drie maal het ek lyfstraf gekry, en een maal is ek met klippe gegooi. Drie maal het ek skipbreuk gely en een maal het ek n dag en n nag in die oop see deurgebring. Ek was dikwels op reis en in gevaar: daar was gevare van riviere, gevare van rowers, gevare van my volksgenote en gevare van heidene; gevare in die stad en gevare in die veld; gevare op see en gevare onder vals broers. Daar was vir my harde werk en swaarkry, dikwels nagte sonder slaap, dikwels honger en dors; en dikwels was ek sonder kos, sonder skuiling of bedekking teen die koue. Behalwe dit alles was daar nog die daaglikse bekommernisse, die besorgdheid oor al die gemeentes. Al was die bediening wat God aan Paulus-hulle gegee het hoe moeilik, hulle het nie moed opgegee om die werk te doen wat God vir hulle gegee het om te doen nie. In die gedeelte wat ons vanoggend gelees het, word drie keer gesê dat hulle nie moed opgegee het nie: 2 Korintiërs 4:16: Om hierdie rede word ons nie moedeloos nie Korintiërs 5:6: Daarom is ons altyd vol moed Korintiërs 5:8; Ons is vol moed... Die rede waarom hulle nie moed opgegee het nie, staan in 2 Korintiërs 5:7 (1983/92- Vertaling): want ons lewe deur geloof, nie deur sien nie. Let op hoe hierdie woorde

3 tussen die twee verse staan waarin Paulus sê dat hulle vol moed is. n Lewe deur geloof het hulle in staat gestel om moed te hou en vol te hou met die bediening wat God aan hulle gegee het. 3 Dit is geloof wat vir Paulus laat sê het (2 Korintiërs 4: /92-Vertaling): Al is ons uiterlik besig om te vergaan, innerlik word ons van dag tot dag vernuwe. Dit is geloof wat vir Paulus laat sê het (2 Korintiërs 4: /92-Vertaling): Ons swaarkry in hierdie lewe is maar gering en gaan verby, maar dit loop vir ons uit op n heerlikheid wat alles verreweg oortref en wat ewig bly. Dit is geloof wat vir Paulus laat sê het dat ons aardse woning maar n tent is en dat ons n vaste woonplek in die hemel het (2 Korintiërs 5:1). Dit is geloof wat vir Paulus laat besef het dat, solank as ons in ons aardse woning (naamlik die liggaam) bly, ons nog nie in ons vaste woonplek by die Here woon nie (2 Korintiërs 5:6). Dit is geloof wat Paulus na sy vaste woonplek by die Here laat verlang het (2 Korintiërs 5:8). Dit is geloof wat veroorsaak het dat Paulus net een wens gehad het, en dit is om te lewe soos die Here wil. En so kan ons aangaan om te wys watter invloed geloof op Paulus se lewe gehad het. Die kern daarvan is dat n lewe deur geloof vir Paulus in staat gestel het om die werk te doen wat God vir hom gegee het om te doen. Hebreërs 11 gee n hele lys name van mense wat deur hulle geloof in staat gestel is om die werk te doen wat God vir hulle gegee het om te doen. Neem vir Noag as voorbeeld. In Hebreërs 11:7 staan daar (1983/92-Vertaling): Omdat Noag geglo het, het hy God eerbiedig gehoorsaam toe hy gewaarsku is oor dinge wat nog nie gesien kon word nie. Omdat hy deur geloof gelewe het en nie deur sien nie, het hy die werk gedoen wat God vir hom gegee het om te doen, naamlik om die ark te bou, al kon niemand sien waarvoor hy die ark bou nie. Neem ook vir Abraham as voorbeeld. Al het hy nie geweet waar hy sou uitkom nie, het hy weggetrek, toe God vir hom gesê dat hy dit moet doen. Hy het die sprong in die donker gewaag, want hy het uitgesien na die stad wat vaste fondamente het en waarvan God self die ontwerper en bouer is (Hebreërs 11: /92-Vertaling). Omdat hy deur geloof gelewe het en nie deur sien nie, het hy gedoen wat God gesê het hy moet doen, al kon hy die uiteinde daarvan nie sien nie. Neem ook nog vir Moses as voorbeeld. In Hebreërs 11:26-27 staan daar (1983/92- Vertaling): Die smaad ter wille die Christus het hy n groter rykdom geag as die skatte van Egipte, omdat hy na die beloning uitgesien het. Omdat hy geglo het, het hy Egipte verlaat sonder dat hy vir die woede van die koning bang was. Hy het volhard soos iemand wat die onsienlike God sien. Omdat hy deur geloof gelewe het en nie deur sien nie, was dit wat hy geglo het vir hom belangriker as dit wat hy kon sien (naamlik die skatte van Egipte en die woede van die koning). Omdat hy deur geloof gelewe het en nie deur sien nie, het hy gedoen wat God vir hom gesê het om te doen (naamlik om die volk uit Egipte uit te lei), al kon hy die woede van die farao sien. Die belangrike punt is nou: Watter boodskap het dít alles vir ons? Wat sê dit vir julle?

4 4 Heel eerste moet julle onthou dat God vir julle werk gegee het om te doen. God het aan julle n bediening gegee elkeen van julle! God het julle nie sonder rede op hierdie aarde geplaas nie. Hy het julle met n doel op hierdie aarde geplaas. Verder het God julle nie sonder rede verlos nie. Hy het julle met n doel verlos. En dit is: Om Hom te verheerlik! Om Hom te eer! Dít is hoekom God jou geskape het. Dít is hoekom God jou op hierdie aarde geplaas het. Dít is hoekom God jou hier in Welkom geplaas het. Dít is hoekom God jou verlos het. Ons noem hierdie werk wat God vir jou gegee het om te doen, die missie van God. Dit is die missie wat God aan jou gegee het, waarmee Hy jou uitstuur na die wêreld. Ons beleef tans politieke onsekerheid in ons land, ons het groot ekonomiese probleme, baie mense kry finansieel swaar en sekere dele van ons land beleef n droogte. Dit is die dinge wat ons sien. Hierdie dinge wat ons sien, maak ons bang. Die dinge wat ons sien, maak ons benoud oor die toekoms. Daarom is daar hoë vlakke van angs in ons land angs oor ons kinders se toekoms, angs oor die voortbestaan van die dinge wat vir ons kosbaar is soos ons taal, en so kan ek aangaan. Angs laat jou onseker voel. Dit laat jou ongemaklik voel. Dit frustreer en jy raak humeurig en gou kwaad. Wanneer jy deur geloof lewe en nie deur sien nie, word jou lewe nie meer bepaal deur al hierdie dinge wat jy sien en wat jou so bang en beangs oor die toekoms maak nie. Dan word jou lewe bepaal deur die werk wat God vir jou gegee het om te doen, naamlik om Hom te verheerlik en Hom te eer. Dan is jy nie meer so vol angs en benoud oor die toekoms nie. Wanneer jy deur geloof lewe en nie deur sien nie, word jou lewe bepaal deur die missie van God. Dan ontdek jy dat die lewe nog nooit oor jou gegaan het nie. Nooit ooit nie. Jy ontdek dan dat dit nog nooit oor jou land of jou volk of jou groep gegaan het nie. Jy ontdek dan dat dit nog altyd oor God gegaan het. Die Bybelse verhaal van God se pad met die volk Israel bewys dit. Dit het nie oor Israel gegaan nie, maar oor God. As Israel verkeerd gedoen het, het God hulle gestraf en hulle deur swaar tye laat gaan. Soms het God die swaar tye langer laat duur as wat hulle gehoop het. In dit alles het God sy raadsplan uitgevoer en sy Seun na hierdie wêreld toe gestuur. Later het Hy ook sy Heilige Gees gestuur presies soos sy plan nog altyd was. En toe die volk Israel hulle verhard het, het God sy boodskappers na die heidennasies toe gestuur met die gevolg dat baie mense uit die heidennasies gelowiges geword het en gered is. God se koninkryk het steeds gekom en is besig om te kom. Dit beteken nie dat die dinge wat vir jou kosbaar is (soos jou land of jou taal of jou kinders of jou huis of wat ookal), nie vir jou kosbaar mag wees nie. Dit mag vir jou kosbaar wees, maar dit is en bly minder belangrik as die skatte van die hemel. Dit bly minder belangrik as jou geloof. Dit bly minder belangrik as die werk wat God vir jou gegee het om te doen. Wanneer jy deur geloof lewe en nie deur sien nie, kan jy vol moed bly. Jy kan vol moed bly, want jy weet jou hoop hang nie af van die slegte dinge wat jy sien en wat jou so bang en beangs maak oor die toekoms nie. Jy kan veral vol moed bly om die werk te doen wat God vir jou gegee het om te doen. Die werk wat God vir jou gegee het om te doen, naamlik om Hom te verheerlik en te eer, is iets wat jy altyd sal kan doen, maak nie saak

5 5 hoe sleg dit gaan nie. Daarom kan jy die toekoms vol moed ingaan, wanneer jy deur geloof lewe en nie deur sien nie. Jy sal altyd die werk kan doen wat God vir jou gegee het om te doen. Om deur die geloof te lewe, beteken nie dat jy nooit sal misluk nie. Dis nie n suksesresep vir n volmaakte lewe nie. Neem weer die drie geloofshelde na wie ek vroeër in die preek verwys het, as voorbeeld. Noag het een keer so dronk geword dat sy seuns hulle vir hom geskaam het. Abraham was so bang vir die farao dat hy gelieg het en gesê het dat Sara sy suster is. Moses het n Egiptenaar doodgeslaan en hom onder die sand begrawe. Al het hulle deur geloof gelewe, het Noag en Abraham en Moses almal by geleentheid gefaal by meer as een geleentheid. Wanneer jy misluk, is dit juis belangrik om deur geloof te lewe. Wat sien jy, wanneer jy misluk? Jou mislukkings! Moet dan nie lewe deur wat jy sien nie. Lewe deur die geloof dat Jesus Christus al die slegte gevolge van jou mislukkings reg gemaak het. Lewe deur die geloof dat Jesus Christus jou verlos het van die straf wat jy weens jou mislukkings verdien het. Lewe deur die geloof dat Jesus Christus die skande weggeneem het wat jy weens jou mislukkings oor jouself gebring het. Lewe deur die geloof dat jy nie die produk is van al jou mislukkings en sonde (wat jy kan sien) nie, maar dat jy die produk is van wat God alles vir jou gedoen het (wat jy glo). Ja, n lewe deur geloof en nie deur sien nie, laat jou jouself in heeltemal n nuwe lig sien naamlik die nuwe mens wat God jou gemaak het. Kom ek vat saam. Dit is belangrik dat ons deur geloof lewe. Dit beteken dat jy met hoop kan lewe. Jy kan met hoop lewe, want jy verwag n nuwe hemel en n nuwe aarde eendag in die hiernamaals wanneer jy ewig by God en saam met God gaan lewe. Maar dit beteken nie noodwendig dat dinge nou of binnekort op hierdie aarde beter sal gaan nie. Dit kan ons nie sê nie, want ons weet nie wat die pad is wat vir ons voorlê volgens wat God oor ons besluit het nie. Maar onthou, dit gaan mos nie oor jou nie. Dit gaan oor God. Dit gaan oor die bediening wat God vir jou gegee het, naamlik om Hom te verheerlik en te eer. n Lewe deur geloof beteken dat jy nie sal moed opgee om die werk te doen wat God vir jou gegee het om te doen nie. Amen.